ومــش فــــارقة

ده كلام كتبته من حوالي 4 سنين ونشرته علي منتدي قهوة كتكوت
يمكن الكلام مايعجبش ناس كتير بس أنا بحبه جداً
يمكن كمان يكون يكون أحب كلام أنا كتبته لقلبي

ومش فارقه ... هتيجي معايا
أو تمشي طريق تاني
مانا طول عمري وحداني
وطول عمرك بعيد عني
وكنت أما بتحتاجني
بتلقاني
طريق موصول
مابين العسرى واليسرى
وكنت أما تعوز تبكي
تلاقيني واقف جنبك
وأمسح دمعي ودموعك
ولما كنت أنا أحتجلك
مابلقاكشي
وكنت اصرخ بعلو الصوت
ماتسمعشي
وكنت فـ جرحي تجرحني
بلا مبلاه
وأقول خلاص مايلزمشي
أنا همشي
وألعن سلسفين جدك
وأعلن توبتي من حبك
نصوحه مامنهاش رجعه
لكن لما بتندهلي مابقدرشي
وبرجعلك
وأرجع تاني وأسمعلك
وأصدقلك كلام مغشوش
وترجع تاني تجرحني
وتدبحني
خلاص قلبي ماهوش حملك
ولا حمل الجراح تاني
أنا ماعرفش أكون قاسي
ولا آناني
لكن أعرف أنا أبعد
وصدقني أنا همشي
وتيجي معايا .. أو ماتجيش
ماتفرقشي
خلاص قلبي أنا اتعلم
مايندمشي