أنا خارج التصنيف - 1

بصوا أنا مش عارف تصنيفي ايه
يعني أنا شايف ان الشيوعية غلط .. ليه بقي ؟ عشان ماينفعش أنا اشتغل زي الحمار وواحد مابيشتغلش خالص ويبقي دخلنا زي بعض .
هيجي واحد يسألني يعني الراجل اللي مش بيشتغل ده يموت من الجوع ؟
لا طبعا .. المفروض ان الدولة توفرلة رعاية صحية كاملة .. وتوفرله الحد المعقول من المعيشة .. بيت ادمي و أكل كافي وهدوم محترمة .. وده كله من ضرايبي وضرايب الناس اللي بتشتغل .
كمان أنا مؤمن ان الدولة المفروض تملك الصناعات الحيوية في البلد بس .. الحديد والصلب .. الاسمنت .. السيارات .. الأدوية .. بس ماتملكش بيتي أو محل أم محمد اللي أول الشارع .. ومحل عبده الحلاق.
تمام كده ؟ خلونا نشوف الدول الشيوعية منظرها ازاي
دولة الحزب الواحد دولة فاشلة بكل معني الكلمة .. ومن التجارب الدول الشيوعية كلها دول حزب واحد .. راجع كوبا وكوريا الشمالية وقبلهم الاتحاد السوفيتي .
وكل ما تكلم واحد شيوعي يقولك الخطأ مش في النظرية .. الخطأ في التطبيق ... طيب أمال لما عمالقة وجهابزة الشيوعية زي لينين وستالين و فيديل كاسترو والناس دي فشلوا في تطبيق النظرية .. أمال مين اللي هيقدر؟
عايزين عدد كافي من الناس تؤمن بالنظرية ؟ طيب ولو ماحصلش هتعملوا ايه؟ هتفضلوا مؤمنين بنظريات علي ورق بس؟ ولا هتمسكوا الحكم والمعارضين هتنفوا لسيبريا برضه؟
مش عارف ليه سيبريبا معلقة في دماغي بضحايا الشيوعية؟
الشيوعيين كلهم بيصوروا ان الشيوعية هي الكمال في التفكير البشري وان الجنة علي الأرض مش هتتحقق إلا بالشيوعية .. وأنا بشوف ان الكوبيين بالملايين بيهربوا من جنة الشيوعية إلي نار الامبريالية .. 10% من الكوبيين هربانيين لأمريكا ومحدش يقولي ان ال10% دول عملاء للامبريالية والكلام الأهبل ده ... دول 10% من الشعب .. حوالي مليون و 200 الف بني أدم .
أصدق اللي بيديني في نظريات مكتوبة علي ورق ولا أصدق ناس عاشت التجربة بنفسها ؟
خليني أنا اللي مابفهمش .. ازاي واحد يركب مركب صغير ويركب البحر وهو عارف ان نسبة نجاته ماتجيش 20% ولو اتمسك هيدخل سجون كاسترو اللي مش بترحم أو البحر يبلعة زي ما بلع كتير غيره وحتي لو وصل للشط التاني مش بيقدر يرجع بلده تاني ولا يشوف اهله ولا يبعت فلوس لناسه ولا يتصل بيهم ... يعني بيقطع نفسه خالص عن حياته السابقة (قبل تخفيف القيود الأمريكية الأخيرة علي كوبا) .. ومع ذلك مش بيفكر مرتين وبيهرب.
طبعاً مش ده بس ... أنا لو اتكلمت عن الاتحاد السوفيتي مش هبطل كتابة غير بعد سنة ونص ..

مش عايز يجي حد بعد كده يقولي كوريا الشمالية افضل من السويد ... أو ان كوبا جنة الله علي الارض عكس فرنسا أو إنجلترا .
وعلي فكره هبقي اكتب موضوع كامل عن الأناريكية عشان الاناريكية دي هتجيبلي شلل اطفال هي واللي مؤمنين بيها وبحتميتها التاريخية
المرة الجاية بقي هنبقي نتكلم عن الرأسمالية وبلاويها
فتكوا بعافية

مدون من الزمن الوسخ

أنا ناوي كده والنية لله انى افرقع الدنيا واكسر الكون
هنزل مصر اجازة بكاميرا فيديو وأدور في الشوارع لغاية لما الاقي حاجه تنفع تنزل علي المدونة ومين عارف؟ ممكن تضرب وتكسر الدنيا وابقي بقي مدون مشهور يشار إلي بالبنان
ومقالات عني بقي وابقي مصدر أخبار ومشهور وأعمل لقاءات تلفزيونية واتنطط من قناة لقناة وكله بحسابه.
وأفضل اشتم في أي حد مختلف معايا في الرأي .. ده حمار وده ابن شرموطة وده بهيم مابيفهمش .
ليه لا مانا بس اللي بفهم وأي حد تاني مابيفهمش .. مش أنا اللي علمت الناس التدوين ؟ وأي حد يدون بعدي يبقي بشخة وعيل سيس لسه بياخد المصروف من أمه .
وطبعاً مش هنزل اي مظاهرات ولا هشارك في اي حدث سياسي بره المدونة بتاعتي ... كل نضالي هيكون اليكتروني .. بس زي مانتوا عارفين ان ان النضال الاليكتروني أهم من اي مظاهرات و ضغط شعبي علي الحكومة .
وهقول طبعاً ان العيال اللي بتنزل المظاهرات عيال سيس ولا يفهموا حاجه في السياسة ولا سمعوا عن التنظيم ووسائل الضغظ ومش بعيد اتهمهم بالعمالة .
مانا الملهم الوحيد اللي بفهم التايهه .
وهقول علي كل التيارات السياسية انهم ولا يفهموا حاجه وهيضيعوا الشعب وراهم ... ده بيقبض من أمريكا وده من الاتحاد الأوربي وده من القذافي وده من ايران وده عميل الأمن ومحدش فيهم بيشتغل للشعب... وانا الوحيد اللي مش بقبض من حد ...مع اني عاطل شغل ومش عميل لحد .

اه يا نضال اخر زمن .
يللا فتكوا بعافيه

أول موضوع

أول موضوع دايماً بيعرف المدون بنفسه وكده يعني .
بس زي مانتوا عارفين أنا مش مدون ولا حاجه .
وحركة التدوين في مصر ما شاء الله .. الله اكبر مليانه ناس زي الفل والمدونات مالية النت ومش ناقصة يعني واحد زيي انا ... لا انا عايش في مصر عشان اعمل تغطيات ولا ليا معارف وعلاقات عشان اجيب منهم معلومات و داتا اعمل بيها تدوينات مهمه.
وبعدين انا كمان مسميها تأملاتي ... يعني قال فيلسوف ..
بكل الحكاية ان فيه مواضيع بشوفها ساعات بزاوية مختلفة عن ناس كتير فحبيت اعرض الزاوية دي ووجهة نظري المتواضعة فيها
كمان كنت بكتب موضوعات مرمية في المنتديات هحاول اجمع منها شوية هنا عشان ماتضيعش عشان ابقي اوريها لأولادي ان شاء الله .
يللا بقي فوتكوا بعافيه