Sunday, June 27, 2010

أنا خارج التصنيف - 1

بصوا أنا مش عارف تصنيفي ايه
يعني أنا شايف ان الشيوعية غلط .. ليه بقي ؟ عشان ماينفعش أنا اشتغل زي الحمار وواحد مابيشتغلش خالص ويبقي دخلنا زي بعض .
هيجي واحد يسألني يعني الراجل اللي مش بيشتغل ده يموت من الجوع ؟
لا طبعا .. المفروض ان الدولة توفرلة رعاية صحية كاملة .. وتوفرله الحد المعقول من المعيشة .. بيت ادمي و أكل كافي وهدوم محترمة .. وده كله من ضرايبي وضرايب الناس اللي بتشتغل .
كمان أنا مؤمن ان الدولة المفروض تملك الصناعات الحيوية في البلد بس .. الحديد والصلب .. الاسمنت .. السيارات .. الأدوية .. بس ماتملكش بيتي أو محل أم محمد اللي أول الشارع .. ومحل عبده الحلاق.
تمام كده ؟ خلونا نشوف الدول الشيوعية منظرها ازاي
دولة الحزب الواحد دولة فاشلة بكل معني الكلمة .. ومن التجارب الدول الشيوعية كلها دول حزب واحد .. راجع كوبا وكوريا الشمالية وقبلهم الاتحاد السوفيتي .
وكل ما تكلم واحد شيوعي يقولك الخطأ مش في النظرية .. الخطأ في التطبيق ... طيب أمال لما عمالقة وجهابزة الشيوعية زي لينين وستالين و فيديل كاسترو والناس دي فشلوا في تطبيق النظرية .. أمال مين اللي هيقدر؟
عايزين عدد كافي من الناس تؤمن بالنظرية ؟ طيب ولو ماحصلش هتعملوا ايه؟ هتفضلوا مؤمنين بنظريات علي ورق بس؟ ولا هتمسكوا الحكم والمعارضين هتنفوا لسيبريا برضه؟
مش عارف ليه سيبريبا معلقة في دماغي بضحايا الشيوعية؟
الشيوعيين كلهم بيصوروا ان الشيوعية هي الكمال في التفكير البشري وان الجنة علي الأرض مش هتتحقق إلا بالشيوعية .. وأنا بشوف ان الكوبيين بالملايين بيهربوا من جنة الشيوعية إلي نار الامبريالية .. 10% من الكوبيين هربانيين لأمريكا ومحدش يقولي ان ال10% دول عملاء للامبريالية والكلام الأهبل ده ... دول 10% من الشعب .. حوالي مليون و 200 الف بني أدم .
أصدق اللي بيديني في نظريات مكتوبة علي ورق ولا أصدق ناس عاشت التجربة بنفسها ؟
خليني أنا اللي مابفهمش .. ازاي واحد يركب مركب صغير ويركب البحر وهو عارف ان نسبة نجاته ماتجيش 20% ولو اتمسك هيدخل سجون كاسترو اللي مش بترحم أو البحر يبلعة زي ما بلع كتير غيره وحتي لو وصل للشط التاني مش بيقدر يرجع بلده تاني ولا يشوف اهله ولا يبعت فلوس لناسه ولا يتصل بيهم ... يعني بيقطع نفسه خالص عن حياته السابقة (قبل تخفيف القيود الأمريكية الأخيرة علي كوبا) .. ومع ذلك مش بيفكر مرتين وبيهرب.
طبعاً مش ده بس ... أنا لو اتكلمت عن الاتحاد السوفيتي مش هبطل كتابة غير بعد سنة ونص ..

مش عايز يجي حد بعد كده يقولي كوريا الشمالية افضل من السويد ... أو ان كوبا جنة الله علي الارض عكس فرنسا أو إنجلترا .
وعلي فكره هبقي اكتب موضوع كامل عن الأناريكية عشان الاناريكية دي هتجيبلي شلل اطفال هي واللي مؤمنين بيها وبحتميتها التاريخية
المرة الجاية بقي هنبقي نتكلم عن الرأسمالية وبلاويها
فتكوا بعافية

2 comments:

  1. مش عارفة اقول لك ايه
    بس انا حاسة انك عامل جملة اخطاء يا وائل
    اولا: مافيش حاجة في الشيوعية اسمها حد يشتغل زي الحمار وحد ما يشتغلش والاتنين ياخدوا زي بعض
    لان مافيش حد المفروض يشتغل زي الحمار
    الانسان انسان مش حمار
    ومافيش حاجة اسمها ما يشتغلش خالص
    ثانيا: انا ملاحظة انك بتردد كلام الدعاية الامبريالية حقا وصدقا ويقينا
    طب بس من غير حساسة
    اللي انت بتقوله على الشيوعية بيتقال على الاسلام على فكرة
    واكتر كمان
    مافيش جنة على الارض
    الجنة في الاخرة
    لكن سجون كاسترو فظيعة مريعة وسجن جوانتانمو اخباره ايه؟
    بلاش جوانتانمو
    ليه؟ هو مافيش تعذيب في امريكا لمواطنين امريكان وللا ايه؟
    وبعدين يا سيدي انت ضد ان الدولة تمتلك محل ام محمد وبيتك؟
    طب كويس، ياريت تقول الكلام ده للنظم الراسمالية اللي بتحجز على بيوت الناس
    هو مين في النظم الراسمالية يمتلك اي حاجة دي كدبة؟ عربيتك وبيتك وشغلك على كف عفريت لو تعثرت البنك يحجز على كل املاكك وتلاقي نفسك في الشارع

    وبعدين والنبي بلاش تعايب على موضوع الخطأ في التطبيق مش في النظرية عشان ده بيتقال على كل حاجة
    ده حتى المسلمين بيقولوا فرقوا بين الاسلام والمسلمين مش عارفة ازاي يعني؟
    بس عموما انا مش شايفة ان التطبيق مش سيء او مش هو الاسوأ مش أسوأ من امريكا بدون ذكر اسماء ولا حاجة
    القوى العالمية هي اللي بتشوه وتشيطن ناس معينة لانهم ضد مصالحها الراسمالية

    ReplyDelete
  2. أولا نورتي المدونة ... وشرف للمدونة وليا انك يكون اول تعليق عليها هو تعليق نوارة نجم :)
    ثانياً : أنا لا باحث ولا عالم ولا دارس ولا اي حاجه ... أنا بقول رأي الانسان العادي اللي بيشوف الحاجات بمنظور قاصر :)
    الشيوعية طبعاً فيه ناس بتشتغل زي الحمير ... وزي ما في الرأسمالية الناس عبيد رأس المال ... في الشيوعية الناس عبيد الحزب ونظرياته .
    الإنسان انسان مش حمار ده نظرياً برضه ... بس عمليا ناس كتيررررر قوي بتشتغل زي الحمير وأنا أولهم
    وطبعاً مش بردد كلام الامبرياليين ولا الكلام ده ... لأني بكره الامرياليه زي كرهي للشيوعية وأكتر .
    هو انا قولت اني موافق علي حونتانمو؟ جونتانمو ده صفعة علي وجه الإنسانية بلا مبالغة .
    وصمة عار في دولة بتقول انها بترعى الديموقراطية وحموم الإنسان .
    وهقولك اه فيه تعذيب في أمريكا برضه ... بس خلينا واقعيين ..مستحيل هتكون زي اللي كانت في الإتحاد السوفيتي ايام الستار الحديد والمراحيم لينين و ستالين .
    وانا موافقك ان الناس في الرأسمالية مش بتتملك حاجه الا بعد عمر طويل واللي بيوقع بيتهرس بطواحين رأس المال ...
    بس علي فكره انا عايش في دولة رأسمالية بحته وبملك بيتي و عربيتي ملكية تامة ... اشتريتهم كاش :) بس ده مش من مميزات الرأسمالية ولكن من مميزات الإدخار :)
    انا مش بعايب علي موضوع الخطأ في التطبيق ... أنا بقول اللي هما بيقولوه .. كل ما تقولي لحد جيبلي مثال ... يقولك ان الأمثلة اللي اتطبقت كلها غلط .. يعني بنفضل برضه في نظريات مش اكتر ... وأنا عارف انك مش شيوعية وأنا عن نفسي ميولي اشتراكية جداً والله .

    ReplyDelete